بِاسْمِهِ سُبْحَانَهُ  ❊  وَاِنْ مِنْ شَيْءٍ اِلاَّ يُسَبِّحُ بِحَمْدِهِ
اَلسَّلاَمُ عَلَيْكُمْ وَ رَحْمَةُ اﷲِ وَ بَرَكَاتُهُ
    عزيز، صدّيق قارداشلرم!
    سزڭ مبارك رمضانِ شريفڭزى تبريك ايدييورز. جنابِ أرحم الراحمين بو رمضانِ مباركه‌نڭ حرمتنه رحمةً لِلعالمين اولان رسولِ أكرم عليه الصلاة والسلامڭ امّتنه رحمتيله إمداد أيله‌سين! آمين. آثارِ غضبِ إلٰهى اولان آفات و ضلالتلردن محافظه أيله‌سين! آمين. و رسالۀِ النور شاكردلرينى نشرِ أنوارِ قرآنيه‌ده موفّق أيله‌سين! آمين.
    حزب الأعظمِ قرآنينڭ گلمسنى إشتياقله بكله‌يورز.
    ثانيًا: حافظ علينڭ مكتوبنده، قهرمان سليمان رشدينڭ گلمسنى تبشير ايدييور. بز ده اوڭا، ”بيڭلر صفالرله گلدڭ“ دييوب و اوچ جهتله اونى و معصوملرينى تبريك ايدييورز. و حسن عاطفڭ، دميرجى محمد نامنى ويرديگى بدوى قارداشمزه يازديغى اوزون مكتوبى بوراده‌كى قارداشلريمزه إخلاص نقطه‌سنده أهمّيتلى تأثيرى وار. إخلاص رساله‌سنڭ سرّينى و دستورلرينى يرلشديرمگه چاليشماسى، بزى چوق مسرور أيلدى. جنابِ حق اونڭ گبى خالص قارداشلرى چوغالتسين. و عاطفڭ او مكتوبنده مدرسۀِ نوريه‌ده‌كى قهرمانلردن قيمتدار بر ايكى يوكسك إختيارڭ، رسالۀِ النوره پارلاق إرتباطلرى بزى سُرور ياشيله آغلاتديردى.