بشنجيسى: {وَمَا قَدَرُوا اﷲَ حَقَّ قَدْرِهِ وَ اْلاَرْضُ جَمِيعًا قَبْضَتُهُ يَوْمَ الْقِيَامَةِ وَ السَّمٰوَاتُ مَطْوِيَّاتٌ بِيَمِينِهِ} دن طوت، تا {وَ اعْلَمُوا اَنَّ اﷲَ يَحُولُ بَيْنَ الْمَرْءِ وَ قَلْبِهِ} يه قدر.. هم {اَﷲُ خَالِقُ كُلِّ شَيْءٍ وَ هُوَ عَلٰى كُلِّ شَيْءٍ وَكِيلٌ} دن طوت، تا {يَعْلَمُ مَا يُسِرُّونَ وَمَا يُعْلِنُونَ} ئه قدر.. هم {خَلَقَ السَّمٰوَاتِ وَ اْلاَرْضَ} دن طوت، تا {خَلَقَكُمْ وَمَا تَعْمَلُونَ} ئه قدر.. هم {مَا شَاءَ اﷲُ لاَ قُوَّةَ اِلاَّ بِاﷲِ} دن طوت، تا {وَمَا تَشَاؤُنَ اِلاَّ اَنْ يَشَاءَ اﷲُ} يه قدر حدودِ عظمتِ ربوبيتى و كبرياءِ الوهيتى طوتمش اولان أزل و أبد سلطانى، شو عاجز و نهايتسز ضعيف و نهايتسز فقير و نهايتسز محتاج و يالڭز جزئى بر إختيار ايله ايجاده قابليتى اولميان ضعيف بر كسب ايله مجهّز بنى آدمه قارشى شديد شكاياتِ قرآنيه‌سى و عظيم تهديداتى و مدهش وعيدلرى نه حكمته بناءًدر و نه وجهله توفيق ايديلير؟. نه صورتله مناسب دوشر؟. ديمك اولان درين و يوكسك حقيقته قناعت گتيرمك ايچون شو گله‌جك ايكى تمثيله باق:

برنجى تمثيل: مثلا شاهانه بر باغ وار كه، نهايتسز ميوه‌دار و چيچكدار مصنوعلر ايچنده بولونويورلر. اوڭا نظارت ايتمك ايچون پك چوق خدمه‌لر تعيين ايديلمش. بر خدمتكارڭ وظيفه‌سى دخى، يالڭز او باغه ياييلاجق و ايچيله‌جك صويڭ مجراسنده‌كى دليگڭ قپاغنى آچمقدر. و شو خدمتكار ايسه تنبللك ايتدى، دليگڭ قپاغنى آچمادى. او باغڭ تكمّلنه خلل گلدى وياخود قورودى. او وقت خالقڭ صنعتِ ربّانيه‌سندن و سلطانڭ نظارتِ شاهانه‌سندن و ضيا و هوا و طوپراغڭ خدمتِ بنده‌گانه‌سندن باشقه بتون خدمه‌لرڭ، او سرسمدن شكوايه حقلرى واردر. زيرا خدمتلرينى عقيم بيراقدى ويا ضرر ويردى.