ھاوڕێ‌کەی وەڵامی دایەوە:

= ئایا ئیتر دوای ئەم ڕوون‏کردنەوانە من چی بڵێم؟ بۆچی لە بەرامبەر ئەم ڕاستییانەوە بواری قسە و باس بۆ ھیچ قسەکەرێک ماوەتەوە تا قسەی تێدا بکات؟ یان ئایا بە خۆری ناوجەرگەی ئاسمان دەوترێت: کوا خۆر لە کوێ‌یە؟! دیارە نەخێر.. بەڵام دەمەوێت تەنھا ئەوەندە بڵێم کە: ھەزارویەک شوکر و سوپاس بۆ خوای گەورەی پەروەردگار کە لە چنگی وەھم و گومان ڕزگاری کردم و، لە دیلیی نەفس و بەندیخانەی ھەمیشەیی دەرباز بووم و، باوەڕم‏ ھێنا کە خانەیەکی بەختەوەری لە حوزووری پادشای مەزن‏دا بۆ ئێمە ئامادە کراوە، تاکو دوای ئەم خانە فانی و شپرز و شلۆق و شێواوەی ئێرە کۆچی بۆلا بکەین.

بەم جۆرە، ئەم چیرۆکەی کە "کینایە" و ھێمایەک بوو بۆ حەشر و قیامەت، لێرەدا دوایی‏ ھات و، لەمەولا بە پەنا و پشتیوانیی خوای گەورەی بەتوانا بەرەو ڕاستی‏یە مەزن و بەرزەکان دەڕۆین و دەگوێزینەوە و، بەرامبەر بەو دوازدە وێنەیەی پێشوو "دوازدە ڕاستی"ی ڕوونی ئەوتۆ باس‏ دەکەین کە پەیوەندییەکی توندوتۆڵیان لەنێواندایە، دوای ئەوەی کە بە نووسینی "پێشەکی"یەک ڕێ بۆ باس‏کردنی ئەو ڕاستییانە خۆش دەکەین.