ايكى قهرمان مبارك، يازدقلرى گوزل ايكى ميوه‌لرينڭ طرزنده و قطعه‌سنده اون برنجى مسئله‌سنى دخى يازوب، درت بش نسخه حزبِ نوريه وارسه و بش آلتى حزبِ قرآنيه ايله برابر گوندريلسه مناسبدر. و خسروڭ فقره‌سى، اون برنجى مسئله‌نڭ آخرنده قيد ايديلسين. سزه بو دفعه آيت الكرسينڭ آرقداشى و تتمّه‌سى ايكى اوچ آيتڭ بر نكتۀِ إعجازيه‌لرينه دائر بر پارچه گوندردم؛ داها تماملامغه بر إخطار آلمادم، نقصان قالدى؛ پك عجله‌لكله يازيلدى. أهمّيتلى سرلر گوروندى، فقط دنيايه باقمه‌مق ايچون تمام و آچيق يازديريلمادى. أگر خوشڭزه گيتسه، اون برنجى مسئله‌نڭ حاشيه‌سنڭ بر لاحقه‌سى اولارق قيد ايدرسڭز و إعجازِ قرآن رساله‌سنڭ ذيللرنده هم اَلْفَلَقْ نكته‌سنى، هم بونى يازارسڭز.
    قارداشلرم! هيچ مراق ايتمه‌يڭز. قطعى قناعتم گلدى، بزلر بر عنايت آلتنده، غايت أهمّيتلى بر خدمتده و إختيار و إقتداريمز خارجنده بر دستِ غيبى طرفندن إستخدام ايديلييورز. چوق دفعه {عَسٰى اَنْ تَكْرَهُوا شَيْئًا وَهُوَ خَيْرٌ لَكُمْ} سرّينه مظهر اولويورز. بو چاليشمه‌ده زحمت پك آز، اجرت پك چوق.
❊ ❊ ❊
    عزيز، صدّيق قارداشلرم!
    سزڭ غايت مبارك و جنّت ميوه‌لرى گبى شيرين هديه‌لريڭزى و دڭزلى جهتنده‌كى بشارتڭزى آلدم. شيمدى بو دقيقه‌ده پك چوق ايشلر بنى اوزون قونوشديرميه‌جق، قيصه كسمگه مجبور اولدم. چونكه هديه‌يى گتيرن چابوق گيده‌جك دييه عجله يازدم.