آنقره أهلِ وقوفنڭ إتّفاقله ويردكلرى راپورڭ صورتندن
    طولو بولونان جمعًا بش صندوق كتاب، طرفمزدن آچيلارق اوقوندى. (حاشيه) سعيد النورسى طرفندن تأليف ايديلن باصيلمش، باصيلمامش رسالۀِ نور أجزالرى و رسالۀِ نوره أكلى سعيد النورسى ايله بعض شاكردلرى طرفندن يازيلمش قسمًا علمى و دينى مكتوبلرله، شاكردلرڭ بربريله و سعيد النورسى ايله عادى مخابره مكتوبلرى و قيليشه‌لر، اينجه‌له‌مه موضوعى صلاحيتمز داخلنده گوروله‌رك اينجه‌لندى. بونلرڭ ماهيتنى بليرتمك ايچون بو رساله و مكتوبلرى ايكى نوعه آييرمق گركدر:
    رساله‌لر: بر آيتڭ تفسيرى و بر حديثڭ شرحى مقصديله يازيلمش اولانلرى ايله؛ دين، ايمان، اﷲ، پيغمبر، قرآن و آخرت عقيده‌لرينى و عباره‌لرينى آچيقجه آڭلاتمق ايچون تمثيللرله يازيلمش علمى گوروشلرى و إختيارلرله گنجلره خطاب ايدن أخلاقى اوگوتلر و قسمًا حيات تجربه‌سندن آلينمش عبرتلى واقعه‌لر و أصنافه عائد فائده‌لى منقبه‌لرى إحتوا ايدن، موجودڭ يوزده طقساننى تشكيل ايدن رساله‌لردر كه؛ (بونلرده) بتون بو رساله‌لرده مؤلّف هم صميمى، هم حسبى و هم ده علم يولندن و دينى أساسلردن هيچ آيريلمامشدر. بونلرده دينى آلَت ايتمك و جمعيت تشكيل ايتمكله أمنيتى إخلال حركتنڭ بولونمديغى صريحدر. شاكردلرڭ بربريله و سعيد النورسى ايله عادى مخابره مكتوبلرى ده بو نوعدندرلر.
    ١- سعيد النورسى، إستانبولده ايكن قزانديغى أهمّيتلى شان و شرفڭ، قالين بر اويقودن عبارت ثقيل بر رؤيا، موقّت بر سرسملك اولديغنى سويلر. و إستانبولده بر ايكى سنه غفلتله سياسته قاريشديغندن، بونى دنيانڭ ئولومى دييه تصوير ايدر. بو مناسبتله ”أسكى سعيد“، ”يڭى سعيد“ دييه ايكى شخصيت بولونديغنى و بو شخصيتلرڭ بربرندن آيرى اولدقلرينى سويلر. صوڭره، طوقوز عدد برنجيده، يگرمى قدر رساله بولونان مجموعه‌سنڭ صوڭنده، إسپارطه‌ده رسالۀِ نور شاكردلرينه يازيلان مكتوبڭ ايچنده، سياسته تنزّلڭ خطا اولديغنى سويلر.