هم كميته أهمّيت ويريلمز. سن او حواليده بر تك عاطفى بولسه‌ڭ، يوزى بولمش گبيدر. مراق ايتمه. هم ممكن اولديغى قدر خارجدن گلن كوچك ايليشمه‌لره أهمّيت ويرمه. فقط إحتياطله، بو عطالت موسمى و غفلت زمانى و دردِ معيشت إبتلاسى زماننده، جزئى بر إشتغال ده أهمّيتليدر. توقّف دگل، موفّقيتسز مغلوبيت يوق! رسالۀِ النورڭ هر طرفده غالبانه فتوحاتى وار.
    سادسًا: أسكى دوست و قارداش و رسالۀِ النورڭ او زمانده جدّى بر طلبه‌سى و إسپارطه حياتمده بڭا حسنِ خدمتله صميمى بر آرقداش و همّتى اوزون، ألى قيصه عزيز قارداشم محمد جلال!
    سنى او زماندن بَرى اونوتمادم. چوق زمان رسالۀِ النور دائره‌سنده قلميله چاليشانلر ايچنده إسمڭله حصّه‌دار اولويوردڭ. سنڭ يوكسك إستعداديڭى و علوِّ همّتڭى رسالۀِ النورده إستعمال ايتمك آرزولايوردم. ديمك دردِ معيشت، سزى بر درجه قيد آلتنه آلدى. باشده مبارك باباڭ، خانه‌ڭزده بولونانلره بِالمقابله سلام ايدييورم. و بِالخاصّه محمد سيرانى حيّاطه چوق سلام ايله برابر؛ أگر بنم اوراده ايكن طانيديغم و خسرو سيستمنده تلقّى ايتديگم محمد سيرانى ايسه، اونڭ بيڭ سلامنه سلامله مقابله ايدوب؛ او سيرانى او زماندن بَرى رسالۀِ النورڭ بر جزئنه بحثى گيرديگى و سيلنمديگى گبى، خاطرمده ده سيلنمه‌مش. چوق دفعه بكله‌يوردم كه؛ سيرانى، خسروڭ آرقه‌سنده قوشوب چاليشسين. ديمك اونى ده دردِ معيشت باغلامش.
    سابعًا: رسالۀِ النورڭ أركانِ مهمّه‌سندن خليل إبراهيمڭ اون درت ياشنده‌كى أولادِ معنويسى، رسالۀِ النور دائره‌سنده‌كى معصوم شاكردلرڭ دائره‌سنده إن شاء اﷲ أهمّيتلى موقع آلاجق. و او كوچك شخصيتده پارلاق، بيوك بر شاكرد روحى گورونويور. مكتوبنده چوجقجه قونوشمامش؛ غايت مدقّقانه بيوك بر عالم گبى قونوشمسى بزى چوق سَوينديردى. ما شاء اﷲ، بارك اﷲ ديديردى.