استادم، يڭى توافقاتلى قرآنِ عظيم الشانڭ باش طرفنه، بو رمزڭ علاوه‌سى حق و حقيقتى إعلان مقصدينه موافق اولسه ده، اوقودقجه طويمق و اوصانمق بيلينمه‌ين و هر اوقودقجه دنيا لذّتندن بيڭ قات فضله لذّت ويرن و قرارمش قلبلرى نورلانديران و بزه بزم لسانمزله حاللريمزى تشريح و طريقِ حقّى گوسترن رسالۀِ پرنورلريڭزده ده برابر آيريجه بولونماسى و قرآنِ حكيمڭ باشنه ممكن اولورسه هم عربجه‌سنڭ و هم ده توركجه‌سنڭ قونولماسى موافق اولاجغى ظنّنده‌يم، أفنديم حضرتلرى.

إعجازِ قرآنيه‌دن إخلاصِ شريفله معوّذتين و فاتحۀِ شريفه سوره‌لرينڭ توافقاتِ حروفيه سرلرينى گوسترن، يگرمى طوقوزنجى مكتوبڭ سكزنجى رمزينى آلدم و اوقودم. نشر بويوريلان إشبو رساله‌ده‌كى توافقات، شيمدى‌يه قدر أمثالى نامسبوق بر سرّى ميدانه قويمش. بو خصوصه دائر مطالعه‌ده بولونمق، قوّۀِ قلميه‌مڭ و حوصلۀِ موجوده‌مڭ قات قات فوقنده بولونمقله برابر، عفوِِ استادانه‌لرينه مغرورًا شو قدر دييه‌بيليرم كه: نشر بيوريلان رساله‌ده‌كى ايضاحات، هر هانگى بر بدبين و كور اولان بر غافلى اويانديرمغه و حتّى بتون موجوديتيله قرارمش قلبلرى تنويره و إرشاده پك بيوك دليل بولونديغندن، محترم استاديمزڭ تصوّرى قرارى وجهله، هر فردڭ قرآنِ عظيم البرهانده‌كى معجزاتى گورمسى ايچون قرآنڭ باش طرفنه درجى خصوصى پك موافق گورولديگنى عرض أيله‌رم، أفنديم حضرتلرى.