عزيز، صدّيق، صارصيلماز و توكّلڭ ماهيتنى و قيمتنى آڭلايان قارداشلرم

يگرمى سنه‌دن بَرى هيچ بر غزته‌يى نه اوقومق و نه صورمق مراقم اولماديغى حالده، پك چوق تأسّف ايله، يالڭز بر قسم ضعيف قارداشلريمزڭ خاطرلرى ايچون بوگون بر غزته‌نڭ بر بحثنى گوردم. بوندن بيلدم كه؛ پرده آلتنده و اوستنده أهمّيتلى جريانلر رول اوينايورلر. ميدانده بز گورونديگمزدن، بزلر او جريانلرله علاقه‌دار توهّم ايديلييورز. إن شاء اﷲ، رسالۀِ نورڭ درت صندوق قوّتلى جرح ايديلمز رساله‌لرى و پك قطعى مدافعه دفترلرى، بزم حقّمزده هم ايمان و قرآن، إسلام حقّنده بر خيرلى نتيجه ويره‌جكلر. بز اونلرڭ دنيالرينه قاريشمدق و قاريشه‌جغمزى هيچ بر جهتله داها تثبيت ايده‌مديلر. مجبوريتله بتون رسالۀِ نورى آنقره تحقيق ايچون ايستدى

مادام حقيقت بودر و مادام شيمدى‌يه قدر رسالۀِ نورڭ خدمتنده عنايتِ ربّانيه‌نڭ تجلّيسنى إنكار ايديلميه‌جك درجه‌ده گوردك؛ هر بريمز جزئى و كلّى بونى حسّ ايتمشز و مادام شيمدى سياستڭ و دنيانڭ چوق جريانلرينڭ بربرينه قارشى تحشيداتى اولويور و مادام ألمزدن قضايه رضا و قدره تسليم و خدمتِ ايمانيه و قرآنيه و نوريه‌نڭ ويردكلرى بيوك و قدسى تسلّيدن باشقه بر شى گلمييور؛ ألبته بزه أڭ ألزم ايش، تلاش ايتمه‌مك و مأيوس اولمامق و بربرينڭ قوّۀِ معنويه‌سنى تقويه ايتمك و قورقمامق و توكّلله بو مصيبتى قارشيلامق و حبّه‌يى قبّه ياپان فرفره‌لى غزته‌جيلرڭ قبّه‌لرينى حبّه گوروب أهمّيت ويرمه‌مكدر. بو دنيا حياتى، خصوصًا بو زمانده، بو شرائط آلتنده قيمتى يوقدر. باشه نه گلسه گلسين، خوش گورملى