بو رساله‌نڭ محلِّ ظهورى اولان شو مملكت محيطنده رسالة النورڭ سائر رساله‌لرى بولونماديغندن و إختيارسز اولارق بوراده تأليف ايديلديگندن، آيت الكبرا گبى رساله‌لرده، ظاهرى بر تكرار صورتنده باشقه سوزلرڭ و لمعه‌لرڭ بر قسم مهمّ مسئله‌لرى ذكر ايديلمش و بورالرده‌كى شاكردلره نسبةً هر برى برر كوچك رسالة النور حكمنه گچمك حكمتيله بويله يازديريلمش

بو مسودّه‌نڭ برنجى تبييضى بر مبارك ذات طرفندن اولدى. او ذاتڭ توافقدن خبرى يوقكن يازديغى نسخه‌ده، قيده لايق شويله لطيف و معنيدار بر توافق گوردك كه: او نسخه‌نڭ سطرلرى باشنده ”ألف“لر آلتى يوز آلتمش آلتى اولارق يازيلمشدر. بو حال ايسه، حضرتِ إمامِ على (رضى اﷲ عنه) طرفندن بو خصوصى رساله‌يه ويريلن آيت الكبرا نامنڭ جفرى و أبجدى مقامى اولان آلتى يوز آلتمش آلتى عددينه تام تامنه موافقتى و مطابقتى ايله، بو رساله‌نڭ بو نامه لياقتنى گوسترر. هم آياتِ قرآنيه‌نڭ عددى اولان آلتى بيڭ آلتى يوز آلتمش آلتينڭ درت مرتبه‌سندن اوچ مرتبه‌سنه توافقى دخى، بو رساله‌نڭ، آياتڭ بر لمعه‌سى اولديغنه بر إشارتدر دييه تلقّى ايتدك