ايشته شرك، كبريايه طوقونمسى و جلالڭ عزّتنه طوقونديرماسى و عظمتنه ايليشمه‌سى جهتيله اويله بر جنايتدر كه؛ هيچ قابلِ عفو اولماديغنى، قرآنِ معجز البيان عظيم تهديد ايله {اِنَّ اﷲَ لاَ يَغْفِرُ اَنْ يُشْرَكَ بِهِ وَيَغْفِرُ مَا دُونَ ذٰلِكَ} فرمان ايدييور

ايكنجى حقيقت: كائناتده تصرّفلرى گورونن أفعالِ ربّانيه‌نڭ إطلاق و إحاطه و نهايتسز بر صورتده ظهورلريدر. و او فعللرى تقييد و تحديد ايدن، يالڭز حكمت و إراده‌در و مظهرلرڭ قابليتلريدر. و سرسرى تصادف و شعورسز طبيعت و كور قوّت و جامد أسباب و قيدسز و هر يره طاغيلان و قاريشديران عنصرلر، او غايت ميزانلى و حكمتلى و بصيرانه و حياتدارانه و منتظم و محكم اولان فعللره قاريشه‌مازلر، بلكه فاعلِ ذو الجلالڭ أمريله و إراده‌سيله و قوّتيله ظاهرى بر پردۀِ قدرت اولارق إستعمال اولونويورلر

حدسز مثاللرندن اوچ مثالى، سورۀِ نحلڭ بر صحيفه‌سنده بربرينه متّصل اوچ آيتڭ إشارت ايتدكلرى اوچ فعلڭ حدسز نكته‌لرندن اوچ نكته‌سنى بيان ايدرز