سابق يگرمى عدد مسئله‌لره بر تتمّه اولارق اوچ كوچك مسئله‌در

برنجى مسئله: روايتلرده حضرتِ عيسى عليه السلامه ”مسيح“ نامى ويريلديگى گبى، هر ايكى دجّاله دخى ”مسيح“ نامى ويريلمش و بتون روايتلرده {مِنْ فِتْنَةِ الْمَسِيحِ الدَّجَّالِ مِنْ فِتْنَةِ الْمَسِيحِ الدَّجَّالِ} دينيلمش. بونڭ حكمتى و تأويلى نه‌در؟

الجواب: اﷲ أعْلَم بونڭ حكمتى شودر كه: ناصلكه أمرِ إلٰهى ايله عيسى عليه السلام، شريعتِ موسويه‌ده بر قسم آغير تكاليفى قالديروب شراب گبى بعض مشتهياتى حلال ايتمش. عينًا اويله ده؛ بيوك دجّال، شيطانڭ إغواسى و حكمى ايله شريعتِ عيسويه‌نڭ أحكامنى قالديروب خرستيانلرڭ حياتِ إجتماعيه‌لرينى إداره ايدن رابطه‌لرى بوزارق، آنارشيستلگه و يأجوج و مأجوجه زمين حاضر ايدر. و إسلام دجّالى اولان سفيان دخى، شريعتِ محمّديه‌نڭ (ع‌ص‌م) أبدى بر قسم أحكامنى نفس و شيطانڭ دسيسه‌لريله قالديرمغه چاليشه‌رق حياتِ بشريه‌نڭ مادّى و معنوى رابطه‌لرينى بوزارق، سركش و سرخوش و سرسم نفسلرى باشى بوش بيراقه‌رق، حرمت و مرحمت گبى نورانى زنجيرلرى چوزر؛ هوساتِ متعفّنه باتاقلغنده، بربرينه صالديرمق ايچون جبرى بر سربستيت و عينِ إستبداد بر حرّيت ويرمك ايله دهشتلى بر آنارشيستلگه ميدان آچار كه، او وقت او إنسانلر غايت شدّتلى بر إستبداددن باشقه ضبط آلتنه آلينه‌ماز.

ايكنجى مسئله: روايتلرده هر ايكى دجّالڭ خارق العاده إجراآتلرندن و پك فوق العاده إقتدارلرندن و هيبتلرندن بحث ايديلمش. حتّى بدبخت بر قسم إنسانلر، اونلره بر نوع الوهيت إسناد ايدر دييه خبر ويريلمش. بونڭ سببى نه‌در