هر بر ذى‌حيات، مثلا بو سوسلى چيچك و شو طاتليجى سينك، اويله معنيدار، إلٰهى، منظوم بر قصيده‌جكدر كه، حدسز ذى‌شعورلر اونى كمالِ لذّتله مطالعه ايدرلر. و اويله قيمتدار بر معجزۀِ قدرتدر و بر إعلاننامۀِ حكمتدر كه، صانعنڭ صنعتنى نهايتسز أهلِ تقديره جاذبه‌دارانه تشهير ايدر. هم كندى صنعتنى كنديسى تماشا ايتمك و كندى جمالِ فطرتنى كنديسى مشاهده ايتمك و كندى جلوۀِ أسماسنڭ گوزللكلرينى آيينه‌جكلرده كنديسى سير ايتمك ايسته‌ين فاطرِ ذو الجلالڭ نظرِ شهودينه گورونمك و مظهر اولمق، غايت يوكسك بر نتيجۀِ خلقتيدر. هم كائناتده‌كى حدسز فعاليتى إقتضا ايدن تظاهرِ ربوبيته و تبارزِ كمالاتِ إلٰهيه‌يه (يگرمى دردنجى مكتوبده بيان ايديلديگى گبى) بش وجهله خدمتى دخى، علوى بر وظيفۀِ فطرتيدر. و بويله فائده‌لرى و نتيجه‌لرى ويرمكله برابر؛ كندى يرنده، بو عالمِ شهادتده ذى‌روح ايسه روحنى و حدسز حافظه‌لرده و سائر ألواحِ محفوظه‌لرده صورتنى و هويتنى و تخملرنده و يمورطه‌جقلرنده ماهيتنڭ قانونلرينى و بر نوع مستقبل حياتنى و عالمِ غيبده و دائرۀِ أسماده آيينه‌دارلق ايتديگى كماللرى و گوزللكلرى بيراقوب، مسرورانه ترخيص معناسنده بر ظاهرى موت ايله بر زوال پرده‌سى آلتنه گيرر؛ يالڭز دنيوى گوزلردن صاقلانير ماهيتنده گوردم، ”اوخ الحمد ِﷲ!“ ديدم