ايشته إنسانڭ بو أهمّيتلى جامعيتيدر كه: ذاتِ حىّ قيّوم، إنسانه بتون أسماسنى إحساس ايتمك و بتون أنواعِ إحساناتنى طاتديرمق ايچون اويله إشتهالى بر معده ويرمش كه، او معده‌نڭ گنيش سفره‌سنى حدسز أنواعِ مطعوماتيله كريمانه طولديرمش. هم بو مادّى معده گبى حياتى ده بر معده ياپمش. او حيات معده‌سنه طويغولر، أللر حكمنده غايت گنيش بر سفرۀِ نعمت آچمش. او حيات ايسه، طويغولرى واسطه‌سيله، او سفرۀِ نعمتدن هر چشيد إستفاده‌لر ايله، تشكّراتڭ هر نوعنى ياپار. و بو حيات معده‌سندن صوڭره بر إنسانيت معده‌سنى ويرمش كه، او معده، حياتدن داها گنيش بر دائره‌ده رزق و نعمت ايستر. عقل و فكر و خيال، او معده‌نڭ أللرى حكمنده، سماوات و زمين گنيشلگنده، او سفرۀِ رحمتدن إستفاده ايدوب شكر ايدر. و إنسانيت معده‌سندن صوڭره حدسز گنيش ديگر بر سفرۀِ نعمت آچمق ايچون، إسلاميت و ايمان عقيده‌لرينى، چوق رزق ايستر بر معنوى معده حكمنه گتيروب، اونڭ رزق سفره‌سنڭ دائره‌سنى ممكنات دائره‌سنڭ خارجنده گنيشلتوب، أسماءِ إلٰهيه‌يى ده ايچنه آلير قيلمشدر كه، او معده ايله إسمِ رحمانى و إسمِ حكيمى أڭ بيوك بر ذوقِ رزقى ايله حسّ ايدر. ”َاْلحَمْدُ ِﷲِ عَلٰى رَحْمَانِيَّتِهِ وَ عَلٰى حَكِيمِيَّتِهِ“ دير و هكذا.. بو معنوى معدۀِ كبرا ايله حدسز نعمتِ إلٰهيه‌دن إستفاده ايده‌بيلير و بِالخاصّه او معده‌ده‌كى محبّتِ إلٰهيه ذوقنڭ داها باشقه بر دائره‌سى وار