لمعه‌لر | يگرمى ايكنجى لمعه | 344
(342-354)

امّا شو ولايتڭ ملّتى، عموميتله بندن زياده بنى مدافعه ايتمك مجبوريتلرى شوندندر كه: بو طوقوز سنه‌در هم قارداش، هم دوست، هم مبارك اولان بو ملّتڭ حياتِ أبديه‌سنه و قوّتِ ايمانيه‌سنه و سعادتِ حياتيه‌سنه بِالفعل و مادّةً تأثيرينى گوسترن يوزر رساله‌لرله چاليشديغمزى و هيچ بر دغدغه و ضرر، هيچ كيمسه‌يه او رساله‌لر يوزندن گلمديگى و هيچ بر غرضكارانه ترشّحاتِ سياسيه و دنيويه گورولمديگى و ”ِﷲ الحمد“ شو إسپارطه ولايتى، أسكى زمانڭ شامِ شريفنڭ مباركيتى و عالمِ إسلامڭ مدرسۀِ عموميسى اولان مصرڭ جامع الأزهرى مباركيتى نوعندن، قوّتِ ايمانيه و صلابتِ دينيه جهتنده بر مباركيت مقامنى رسالۀِ نور واسطه‌سيله قزانه‌رق؛ بو ولايتده، ايمانڭ قوّتى لاقيدلغه و عبادتڭ إشتياقى سفاهته حاكم اولماسنى و عموم ولايتلرڭ فوقنده بر مزيتِ ديندارانه‌يى رسالۀِ نور بو ولايته قزانديرديغندن، ألبته بو ولايتده‌كى عموم إنسانلر، حتّى فرضا دينسزى ده اولسه، بنى و رسالۀِ نورى مدافعه‌يه مجبوردر. اونلرڭ چوق أهمّيتلى مدافعه حقلرى ايچنده، بنم گبى وظيفه‌سنى بيتيرمش و ”ِﷲ الحمد“ بيڭلرله شاكردلر بنم گبى بر عاجزڭ يرنده چاليشمش و چاليشديغى هنگامده، أهمّيتسز جزئى حقّم بنى مدافعه‌يه سَوق ايتمييور. بو قدر بيڭلرله دعوا وكيللرى بولونان بر آدم، كندى دعواسنى كندى مدافعه ايتمز.

سس يوق

لمعه‌لر