أهلِ سنّت و جماعت دير كه: ”حضرتِ على (ر‌ض)، خلفاءِ أربعه‌نڭ دردنجيسيدر. حضرتِ صدّيق (ر‌ض) داها أفضلدر و خلافته داها مستحق ايدى كه، أڭ أوّل او گچدى.“ شيعه‌لر ديرلر كه: ”حق، حضرتِ على‌نڭ (ر‌ض) ايدى. اوڭا حقسزلق ايديلدى. عمومندن أڭ أفضل حضرتِ عليدر. (ر‌ض)“ دعوالرينه گتيردكلرى دليللرڭ خلاصه‌سى: ديرلر كه: حضرتِ على (ر‌ض) حقّنده وارد أحاديثِ نبويه و حضرتِ على‌نڭ (ر‌ض) ”شاهِ ولايت“ عنوانيله أكثريتِ مطلقه ايله أوليانڭ و طريقلرڭ مرجعى و علم و شجاعت و عبادتده خارق العاده صفتلرى و حضرتِ پيغمبر عليه الصلاة والسلام اوڭا و اوندن تسلسل ايدن آلِ بيته قارشى شدّتِ علاقه‌سى گوسترييور كه؛ أڭ أفضل اودر، دائما خلافت اونڭ حقّى ايدى، اوندن غصب ايديلدى.

الجواب: حضرتِ على (ر‌ض) مكرّرًا كندى إقرارى و يگرمى سنه‌دن زياده او خلفاءِ ثلاثه‌يه إتّباع ايده‌رك اونلرڭ شيخ الإسلاملغى مقامنده بولونماسى، شيعه‌لرڭ بو دعوالرينى جرح ايدييور. هم خلفاءِ ثلاثه‌نڭ زمانِ خلافتلرنده فتوحاتِ إسلاميه و مجاهدۀِ أعدا حادثه‌لرى و حضرتِ على‌نڭ (ر‌ض) زماننده‌كى واقعه‌لر، ينه خلافتِ إسلاميه نقطه‌سنده شيعه‌لرڭ دعوالرينى جرح ايدييور. ديمك أهلِ سنّت و جماعتڭ دعواسى، حقدر.

أگر دينيلسه: شيعه ايكيدر. برى؛ شيعۀِ ولايتدر، ديگرى؛ شيعۀِ خلافتدر. هايدى بو ايكنجى قسم غرض و سياست قاريشديرماسيله حقسز اولسون. فقط برنجى قسمده غرض و سياست يوق. حالبوكه شيعۀِ ولايت، شيعۀِ خلافته إلتحاق ايتمش، يعنى؛ أهلِ طُرُقده‌كى أوليانڭ بر قسمى حضرتِ على‌يى (ر‌ض) أفضل گورويورلر. سياست جهتنده اولان شيعۀِ خلافتڭ دعوالرينى تصديق ايدييورلر.