لمعه‌لر | برنجى لمعه | 7
(5-8)

مادام حقيقتِ حال بويله‌در. ناصلكه حضرتِ يونس عليه السلامه او مناجاتڭ نتيجه‌سنده حوتى اوڭا بر مركوب، بر تحت البحر و دڭزى بر گوزل صحرا و گيجه مهتابلى بر لطيف صورت آلدى. بز دخى او مناجاتڭ سرّيله {لاَ اِلٰهَ اِلاَّ اَنْتَ سُبْحَانَكَ اِنِّى كُنْتُ مِنَ الظَّالِمِينَ} ديمه‌لى‌يز. {لاَ اِلٰهَ اِلاَّ اَنْتَ} جمله‌سيله إستقبالمزه، {سُبْحَانَكَ} كلمه‌سيله دنيامزه، {اِنِّى كُنْتُ مِنَ الظَّالِمِينَ} فقره‌سيله نفسمزه نظرِ مرحمتنى جلب ايتمه‌لى‌يز. تا كه، نورِ ايمان ايله و قرآنڭ مهتابيله إستقبالمز تنوّر ايتسين و او گيجه‌مزڭ دهشت و وحشتى، اُنسيت و تنزّهه إنقلاب ايتسين. و متماديًا موت و حياتڭ دگيشمه‌سيله سنه‌لر و قرنلر أمواجى اوستنده حدسز جنازه‌لر بينوب عدمه آتيلان دنيامز و زمينمزده، قرآنِ حكيمڭ تزگاهنده ياپيلان بر سفينۀِ معنويه حكمنه گچن حقيقتِ إسلاميت ايچنه گيروب سلامتله او دڭزڭ اوستنده گزوب، تا ساحلِ سلامته چيقه‌رق حياتمزڭ وظيفه‌سى بيتسين. او دڭزڭ فورطنه‌لرى و زلزله‌لرى، سينه‌ما پرده‌لرى گبى تنزّهڭ منظره‌لرينى تازه‌لنديرمكله، وحشت و دهشت يرينه، نظرِ عبرت و تفكّرى كيفلنديره‌رك اوقشايوب ايشيقلانديرسين. هم او سرِّ قرآنله، او تربيۀِ فرقانيه ايله؛ نفسمز بزه بينميه‌جك، مركوبمز اولوب، بزى اوڭا بينديروب، حياتِ أبديه‌مزڭ قزانماسنه قوّتلى بر واسطه‌مز اولسون.


سس يوق

لمعه‌لر