٤٧- حياتڭ ياره‌سى إلتيام بولور. عزّتِ إسلاميه‌نڭ و ناموسڭ و عزّتِ ملّيه‌نڭ ياره‌لرى پك دريندر.

٤٨- اويله زمان اولور كه؛ بر كلمه بر اوردويى باتيرير، بر گلّه اوتوز ميليونڭ محوينه سبب اولور. (حاشيه) اويله شرائط تحتنده اولور كه؛ كوچك بر حركت، إنسانى أعلاىِ علّيّينه چيقارير و اويله حال اولور كه؛ كوچك بر فعل، إنسانى أسفلِ سافلينه اينديرر.

٤٩- بر دانه صدق، بر خرمان يالانلرى ياقار. بر دانه حقيقت، بر خرمان خيالاته مرجّحدر.

{لاَ يَلْزَمُ مِنْ لُزُومِ صِدْقِ كُلِّ قَوْلٍ قَوْلُ كُلِّ صِدْقٍ}

هر سوزڭ طوغرى اولمالى؛ فقط هر طوغرى‌يى سويله‌مك، طوغرى دگل.

٥٠- گوزل گورن، گوزل دوشونور. گوزل دوشونن، حياتندن لذّت آلير.

٥١- إنسانلرى جانلانديران أملدر؛ ئولديرن يأسدر.

٥٢- أسكيدن بَرى إعلاىِ كلمة اﷲ و بقاىِ إستقلاليّتِ إسلام ايچون فرضِ كفايۀِ جهادى درعهده ايله كندينى، يك وجود اولان عالمِ إسلامه فدايه وظيفه‌دار و خلافته بايراقدار گورمش اولان بو دولتِ إسلاميه‌نڭ فلاكتى؛ عالمِ إسلامڭ سعادت و حرّيتِ مستقبله‌سيله تلافى ايديله‌جكدر. زيرا شو مصيبت، مايۀِ حياتمز اولان اخوّتِ إسلاميه‌نڭ إنكشافنى خارق العاده تعجيل ايتدى.

------------------------------------------------

(حاشيه : صرب بر نفرڭ آووستريا ولى عهدينه آتديغى بر تك گلّه؛ أسكى حربِ عمومى‌يى پاتلاتديردى، اوتوز ميليون نفوسڭ محوينه سبب اولدى