مكتوبات | يگرمى سكزنجى مكتوب | 554
(492-559)

دردنجى نكته: بش آلتى سؤالى تضمّن ايدن برنجى سؤالڭزده: ”ميدانِ حشره جمع و كيفيت ناصل و عريان مى اولاجق؟ و دوستلرله گوروشمك ايچون و رسولِ أكرم عليه الصلاة والسلامى شفاعت ايچون ناصل بولاجغز؟ حدسز إنسانلرله بر تك ذات ناصل گوروشه‌جك؟ أهلِ جنّت و جهنّمڭ لباسلرى ناصل اولاجق؟ و بزه كيم يول گوستره‌جك؟“ دييورسڭز.


الجواب: شو سؤالڭ جوابى، غايت مكمّل و واضح اولارق، كتبِ أحاديثيه‌ده واردر. مشرب و مسلگمزه عائد يالڭز بر ايكى نكته‌يى سويله‌يه‌جگز. شويله كه:


أوّلا: بر مكتوبده؛ ميدانِ حشر، كُرۀِ أرضڭ مدارِ سنويسنده اولديغنى و كُرۀِ أرض شيمديدن معنوى محصولاتنى او ميدانڭ ألواحلرينه گوندرديگى گبى؛ سنوى حركتيله، بر دائرۀِ وجودڭ تمثّل و او دائرۀِ وجودڭ محصولاتيله بر ميدانِ حشرڭ تشكّلنه بر مبدأ اولديغى و كُرۀِ أرض دينيلن شو سفينۀِ ربّانيه‌نڭ مركزنده‌كى جهنّمِ صغرايى جهنّمِ كبرايه بوشالتديغى گبى، سكنه‌سنى ده ميدانِ حشره بوشالته‌جغى بيان ايديلمشدر.


سس يوق

مكتوبات