يگرمى دردنجى مكتوبڭ ايكنجى ذيلى

(معراجِ نبوى حقّنده‌در)

بِاسْمِهِ ❊ وَ اِنْ مِنْ شَيْءٍ اِلاَّ يُسَبِّحُ بِحَمْدِهِ

بِسْمِ اﷲِ الرَّحْمٰنِ الرَّحِيمِ

وَ لَقَدْ رَاٰهُ نَزْلَةً اُخْرٰى ❊ عِنْدَ سِدْرَةِ الْمُنْتَهٰى ❊ عِنْدَهَا جَنَّةُ الْمَاْوٰى ❊ اِذْ يَغْشَى السِّدْرَةَ مَا يَغْشٰى ❊ مَا زَاغَ الْبَصَرُ وَمَا طَغٰى ❊

لَقَدْ رَاٰى مِنْ اٰيَاتِ رَبِّهِ الْكُبْرٰى

(مولدِ نبوينڭ معراجيه قسمنده بش نكته‌يى بيان ايده‌جگز.)

برنجى نكته: جنّتدن گتيريلن براقه دائر، مولد يازان سليمان أفندى حزين بر عشق ماجراسنى بيان ايدييور. او ذات أهلِ ولايت اولديغى و روايته بنا ايتديگى ايچون، ألبته بر حقيقتى او صورتله إفاده ايدييور.

حقيقت شو اولمق گركدر كه: عالمِ بقانڭ مخلوقلرى، رسولِ أكرم عليه الصلاة والسلامڭ نوريله پك علاقه‌داردرلر. چونكه اونڭ گتيرديگى نور ايله‌در كه؛ جنّت و دارِ آخرت، جنّ و إنس ايله شنلنه‌جك. أگر او اولماسه ايدى، او سعادتِ أبديه اولمازدى و جنّتڭ هر نوع مخلوقاتندن إستفاده‌يه مستعد اولان جنّ و إنس، جنّتى شنلنديرميه‌جكلردى؛ بر جهتده صاحبسز ويرانه قالاجقدى. يگرمى دردنجى سوزڭ دردنجى دالنده بيان ايديلديگى گبى: ناصلكه بلبلڭ گله قارشى داستانۀ عشقى؛ طائفۀِ حيواناتڭ، طائفۀِ نباتاته درجۀِ عشقه بالغ اولان إحتياجاتِ شديدۀِ عشق‌نُمايى، رحمت خزينه‌سندن گلن و حيواناتڭ أرزاقلرينى طاشييان قافلۀِ نباتاته قارشى إعلان ايتمك ايچون، بر خطيبِ ربّانى اولارق، باشده بلبلِ گُل و هر نوعدن بر نوع بلبل إنتخاب ايديلمش و اونلرڭ نغماتى دخى، نباتاتڭ أڭ گوزللرينڭ باشلرنده خوش آمدى نوعندن تسبيحكارانه بر حسنِ إستقبالدر، بر آلقيشلامه‌در.