مكتوبات | اون سكزنجى مكتوب | 121
(118-127)

خاتمه: شو مسئله‌دن آڭلاشيلييور كه: درجۀِ شهود، درجۀِ ايمانِ بِالغيبدن چوق آشاغيدر. يعنى: يالڭز شهودينه إستناد ايدن بر قسم أهلِ ولايتڭ إحاطه‌سز كشفياتى، وراثتِ نبوّت أهلى اولان أصفيا و محقّقينڭ شهوده دگل، قرآنه و وحيه، غيبى فقط صافى، إحاطه‌لى، طوغرى حقائقِ ايمانيه‌لرينه دائر أحكاملرينه يتيشمز. ديمك بتون أحوال و كشفياتڭ و أذواق و مشاهداتڭ ميزانى: كتاب و سنّتدر. و محنكلرى، كتاب و سنّتڭ دساتيرِ قدسيه‌لرى و أصفياءِ محقّقينڭ قوانينِ حدسيه‌لريدر.


ايكنجى مسئلۀِ مهمّه: سؤال: وحدت الوجود مسئله‌سى، چوقلر طرفندن أڭ يوكسك مقام تلقّى ايديلييور. حالبوكه ولايتِ كبراده بولونان باشده خلفاىِ أربعه اولمق اوزره صحابه‌لر و هم باشده خمسۀِ آلِ عبا اولارق أئمّۀِ أهلِ بيت و هم باشده أئمّۀِ أربعه اولارق مجتهدين و تابعيندن بو چشيد وحدت الوجود مشربى صريحًا گورولمه‌مش. عجبا اونلردن صوڭره چيقانلر داها ايلرى مى گيتمشلر، داها مكمّل بر جادّۀِ كبرا مى بولمشلر؟


الجواب: حاشا! شمسِ رسالتڭ أڭ ياقين ييلديزلرى و أڭ قريب ورثه‌لرى بولونان او أصفيادن هيچ كيمسه‌نڭ حدّى دگل، داها ايلرى گيده‌بيلسين. بلكه جادّۀِ كبرا اونلرڭدر.

سس يوق

مكتوبات