سوزلر | اوتوزنجى سوز | 729
(712-744)
ايكنجى مقصد

(تحوّلاتِ ذرّاته دائر)

شو آيتڭ خزينه‌سندن بر ذرّه‌يه إشارت ايده‌جكدر.

بِسْمِ اﷲِ الرَّحْمٰنِ الرَّحِيمِ

وَ قَالَ الَّذِينَ كَفَرُوا لاَ تَأْتِينَا السَّاعَةُ قُلْ بَلٰى وَ رَبِّى لَتَأْتِيَنَّكُمْ عَالِمِ الْغَيْبِ لاَ يَعْزُبُ عَنْهُ مِثْقَالُ ذَرَّةٍ فِى السَّمٰوَاتِ وَلاَ فِى اْلاَرْضِ وَلاَ اَصْغَرُ مِنْ ذٰلِكَ وَلاَ اَكْبَرُ اِلاَّ فِى كِتَابٍ مُبِينٍ

(شو آيتڭ پك بيوك خزينه‌سندن بر مثقال ذرّه مقدارنده، يعنى ذرّه صندوقچه‌سنده اولان جوهرى گوسترر و ذرّه‌نڭ حركت و وظيفه‌سندن بر نبذه بحث ايدر. شو مقصد، بر ”مقدّمه“ ايله ”اوچ نقطه“دن عبارتدر.)


مقدّمه

تحوّلاتِ ذرّات؛ نقّاشِ أزلينڭ قلمِ قدرتى، كتابِ كائناتده يازديغى آياتِ تكوينيه‌نڭ هنگامنده‌كى إهتزازاتى و جولانيدر. يوقسه مادّيون و طبيعيّونلرڭ توهّم ايتدكلرى گبى تصادف اويونجغى و قاريشق، معناسز بر حركت دگلدر. چونكه بتون موجودات گبى ذرّه‌لر و هر بر ذرّه، مبدأِ حركتنده ”بسم اﷲ“ دير. چونكه نهايتسز، قوّتندن فضله يوكلرى قالديرر و بغداى دانه‌سى قدر بر چكردگڭ قوجه بر چام آغاجى گبى بر يوكى اوموزينه آلماسى گبى... هم وظيفه‌سنڭ ختامنده ”الحمد ِﷲ“ دير. چونكه بتون عقولى حيرتده بيراقان حكمتلى بر جمالِ صنعت، فائده‌لى بر حسنِ نقش گوستره‌رك صانعِ ذو الجلالڭ مدايحنه بر قصيدۀِ مدحيه گبى بر أثر گوسترر. مثلا، نار و مصره دقّت ايت.


سس يوق

سوزلر