عينًا اونڭ گبى، قرآنِ معجز البيانڭ دخى، حقيقتِ ممكناته دائر (كه او حقيقت؛ دنيانڭ إبتداسندن طوت، تا آخرتڭ أڭ نهايتنه قدر اوزانمش و فرشدن عرشه و ذرّه‌دن شمسه قدر ياييلمش اولان شجرۀِ خلقتڭ حقيقتنه دائر) بياناتِ فرقانيه‌سى، او قدر تناسبى محافظه ايتمش و هر بر عضوه و ميوه‌يه لايق برر صورت ويرمشدر كه؛ بتون محقّقلر، نهايتِ تحقيقنده، قرآنڭ تصويرينه ”ما شاء اﷲ، بارك اﷲ“ دييوب، ”طلسمِ كائناتى و معمّاىِ خلقتى كشف و فتح ايدن يالڭز سنسڭ أى قرآنِ حكيم!“ ديمشلر.

{وَ ِﷲِ الْمَثَلُ اْلاَعْلٰى} (تمثيلده قصور يوق) أسما و صفاتِ إلٰهيه‌يى، شئون و أفعالِ ربّانيه‌يى، بر شجرۀِ طوباءِ نور حكمنده تمثيل ايده‌لم كه؛ او شجرۀِ نورانيه‌نڭ دائرۀِ عظمتى، أزلدن أبده اوزانوب گيدييور. حدودِ كبرياسى، غيرِ متناهى فضاىِ إطلاقده ياييلوب إحاطه ايدييور. حدودِ إجراآتى، {يَحُولُ بَيْنَ الْمَرْءِ وَ قَلْبِهِ ❊ فَالِقُ الْحَبِّ وَ النَّوٰى ❊ هُوَ الَّذِى يُصَوِّرُكُمْ فِى اْلاَرْحَامِ كَيْفَ يَشَاءُ} حدودندن طوت تا {وَ السَّمٰوَاتُ مَطْوِيَّاتٌ بِيَمِينِهِ ❊ خَلَقَ السَّمٰوَاتِ وَ اْلاَرْضَ فِى سِتَّةِ اَيَّامٍ ❊ وَ سَخَّرَ الشَّمْسَ وَ الْقَمَرَ} حدودينه قدر اوزانمش او حقيقتِ نورانيه‌يى؛ بتون دال و بوداقلريله، غايات و ميوه‌لريله او قدر تناسبله و بربرينه اويغون، بربرينه لايق، بربرينى قيرميه‌جق، بربرينڭ حكمنى بوزميه‌جق، بربرندن توحّش ايتميه‌جك بر صورتده او حقائقِ أسما و صفاتى و شئون و أفعالى بيان ايتمشدر كه، بتون أهلِ كشف و حقيقت و دائرۀِ ملكوتده جولان ايدن بتون أصحابِ عرفان و حكمت، او بياناتِ فرقانيه‌يه قارشى ”سبحان اﷲ“ دييوب، ”نه قدر طوغرى، نه قدر مطابق، نه قدر گوزل، نه قدر لايق“ دييه‌رك تصديق ايدييورلر.